 44.60b འབོད་འགྲོགས་དེ་བཞིན་གཤེགས་པའི་བྱིན་གྱི་བརླབས་ཀྱིས་བཅོམ་ལྡན་འདས་རྒྱ་མཚོའི་ཀླུའི་རྒྱལ་པོའི་གནས་ནས་བྱུང་སྟེ། བརྒྱ་བྱིན་དང་ཚངས་པ་དང ། ཀླུའི་བུ་མོ་བརྒྱ་སྟོང་དུ་མས་བསྐོར་ཅིང་མདུན་དུ་བདར་ནས་རྒྱ་མཚོའི་རླབས་ལ་གཟིགས་ཏེ། ཀུན་གཞི་རྣམ་པར་ཤེས་པའི་རྒྱ་མཚོ་ལ་འཇུག་པའི་རྣམ་པར་ཤེས་པ་ཡུལ་གྱི་རླུང་གིས་བསྐྱོད་ཅིང་དེ་དག་གི་སེམས་འབྱུང་བར་གཟིགས་ཏེ། ཆེད་དུ་བརྗོད་པ་ཆེད་དུ་བརྗོད་པ་མཛད་དོ་ཞེས་ཐོས་ནས། བདག་སོང་ལ་བཅོམ་ལྡན་འདས་ལ་གསོལ་བ་བཏབ་སྟེ་ལང་ཀར་གཤེགས་པར་བྱའོ། །དེ་ནི་བདག་དང་ལྷ་དང་མི་རྣམས་ལ་ཡུན་རིང་པོའི་དོན་དང ། ཕན་པ་དང་བདེ་བར་འགྱུར་རོ་སྙམ་སྟེ། དེ་ནས་གནོད་སྦྱིན་གྱི་བདག་པོ་འབོད་འགྲོགས་འཁོར་དང་བཅས་པ་མེ་ཏོག་གི་གཞལ་མེད་ཁང་དུ་ཞུགས་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང ། འཁོར་དང་བཅས་ཏེ་གཞལ་མེད་ཁང་ནས་བབས་ནས་རྔ་དང་སིལ་སྙན་རྣམས་རབ་ཏུ་སྒྲགས་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་པི་བང་གི་ཁོག་པ་ཨིན་དྲ་ནཱི་ལ་ལ་བཻ་དཱུརྱ་དང ། མུ་ས་རས་སྤྲས་པ། གོས་ངུར་ཀ་པྲི་ཡང་ཀུ་འདྲ་བ་རིན་ཐང་མེད་པས་ཚར་དུ་སྤྱངས་ཏེ། འཁོར་རྣམས་རབ་ཏུ་དགའ་བར་བྱས་ནས། གླུའི་དབྱངས། བརྗོད་དང ། རི་ཥ་བྷ་དང ། གཱན་དྷ་ར་དང ། དྷཻ་བ་ཏ་དང ། ནི་ཥཱ་ད་དང ། མ་དྷྱ་མ་དང ། ཀཽ་ཤི་ཀ་དང ། གླུའི་དབྱངས་མང་པོར་སྦྱར་བ་ལ་སོགས་པ་དང་ལྡན་ཞིང ། རྒྱུད་རྗེས་སུ་འཐུན་པ་དང་པི་བང་གི་ནང་དུ་ཆུད་པར་བྱས་ཏེ་ཚིགས་སུ་བཅད་པའི་དབྱངས་ཀྱིས་གླུ་བླངས་པ། སེམས་ཀྱི་རང་བཞིན་ཚུལ་ཉིད་ཆོས་ཀྱི་གཏེར། །བདག་མེད་ལྟ་དང་རྣམ་བྲལ་དྲི་མ་མེད། །སོ་སོ་རང་རིག་ཤེས་པ་སྟོན་པ་ཡི། །ཆོས་ཚུལ་མགོན་པོ་འདིར་ཡང་བཤད་ཏུ་གསོལ། །དགེ་བའི་ཆོས་ཀྱིས་ཡང་དག་བསགས་པའི་སྐུ། །བདེ་གཤེགས་འཕྲུལ་པས་སྤྲུལ་པ་སྟོན་པ་སྟེ། །སོ་སོ་རང་རིག་རྟོགས་པའི་ཆོས་དགྱེས་པ། །ཐུབ་པ་དེང་ནི་ལང་ཀར་གཤེགས་པའི་དུས། །ལང་ཀ་འདི་ན་སྔོན་གྱི་རྒྱལ་བ་དང ། །དེ་ཡི་སྲས་རྣམས |
